බුදුරජාණන් වහන්සේ විසින් “විශ්වය” පිළිබඳව පැහැදිලි කළ අයුරු

නවීන විද්‍යාව සඳහා ඇත්තේ වසර දෙතුන් සීයයක ඉතිහාසයකි. මෙම කාල වකවානුවේ මුල අවධියේද විශ්වය පිළිඹඳ තිබුණේ ඉතාමත් වැරදි මතයකි. වර්තමානයේ ඉතාමත් දියුණු යැයි පවසන ඇතැම් ජාතීන් මුල් අවධියේදී මුහුදේ දී යාත්‍රා කිරීමට බිය වූයේ පෘථිවිය පැතලි නිසා එහි කෙළවරින් අගාධයට ඇද වැටේ යැයි බියෙනි. සූර්යා පෘථිවිය වටා යනවා නොව පෘථිවිය සූර්යා වටා යනවා වැනි විද්‍යාත්මක මත සොයා ගත් විද්‍යාඥයන්ට පල්ලියෙන් හිමි වූයේ මරණ දඬුවමයි. වර්තාමනයේ කොතරම් දියුණු තත්වයට පැමිණියද නවීන විද්‍යාවට ඇත්තේ ඉතා කෙටි මෙන්ම දුක්ඛිත අතීතයකි.

මීට වසර 2500 කට පමණ ඉහත දී ලොව පහළ වූ සම්මා සම්බුදු බුදුරජාණන් වහන්සේ විශ්වය පිළිබඳ සියල්ල ඇතැඹුලක් සේ අවබෝධ කරගත් සේක. නමුත් උන් වහන්සේ අපට දේශනා කළේ ඉන් නිර්වාණය සඳහා අවශ්‍ය වූ ධර්මතා පමණි. ඇතැම් කරුණු තේරුම් ගැනීම අතිශය සංකීර්ණ වූ නිසා සහ තේරුම් ගැනීම නිෂ්ඵල වූ නිසා දේශනා කර වදාළේ නැත.

බුදුරජාණන් වහන්සේ විශ්වය හෙවත් සක්වළ පිළිබඳ දේශනා කළ කරුණු ස්වල්පය වුවද ඉතාමත් පුදුම සහගතය. නවීන විද්‍යාව ඉතාමත් ආයාසයෙන් අවබෝධ කර ගැනීමට උත්සාහ දරා ඇති සියල්ල බුදුරජාණන් වහන්සේ දේශනා කොට වදාළේ මීට වසර 2500 කටත් ඉහතදී යැයි විශ්වාස කිරීමට පවා අපහසුය.

භාග්‍යවතුන් වහන්සේ සක්වළ පිළිබඳ පැහැදිලි කල චූලනිකා සූත්‍රය

උතුම් වූ ධර්ම භාණ්ඩාගාරික වූ, බහුශ්‍රැතයන් අතරින්ද, ස්මෘතිමතුන් අතරින්ද, අග්‍ර වූ ආනන්ද තෙරුන් වහන්සේ, බුදුරජාණන් වහන්සේගෙන් මෙසේ විමසා සිටියා….

“භාග්‍යවතුන් වහන්ස, අරහත් “සිබී” සම්මා සම්බුදුරජාණන් වහන්සේගේ අග්‍ර ශ්‍රාවක වූ “අභිබූ” මහ රහතන් වහන්සේ විසින් සක්වළ දහසක් දුරට දහම් ඝෝෂා කර සිංහ නාද කර තිබෙනවා. අප සම්මා සම්බුදු භාග්‍යවතුන් වහන්සේට විශ්වයේ කොපමණ දුරට දහම් ඝෝෂා කල හැකිද?”

එවිට භාග්‍යවතුන් වහන්සේ….

ආනන්දය…. “අභිභූ” යනු බුද්ධ ශ්‍රාවකයෙක් පමණි. එසේ නම් බුදු වරයෙක්ට ඇති හැකියාව ප්‍රමාණ රහිත වෙති….

මීට වඩා පැහැදිලි පිළිතුරක් අපේක්ෂා කළ ආනන්ද තෙරුන් දෙවන වරටත් එම ප්‍රශ්නයම විමසුවා. නමුත් බුදුරජාණන් වහන්සේ ලබා දුන්නේ පළමු පිළිතුරමයි.

ආනන්ද තෙරුන් තෙවන වරටත් එම ප්‍රශ්නයම නැවත විමසූ විට බුදුරජාණන් වහන්සේ තීරණය කළා පිළිතුර විස්තර කර පහදා දීමට.

භාග්‍යවතුන් වහන්සේ….

ආනන්දය, ඔබ සක්වළ දහසක් සහිත “චූලනිකා ලෝක ධාතුව” පිළිබඳ අසා තිබේද?

ආනන්ද තෙරුන් වහන්සේ……

මා හට එය පැහැදිලි කර දෙනු මැනවි ස්වාමීනී.

භාග්‍යවතුන් වහන්සේ….

හිරු ද, සඳු ද යම් තාක් දුර ගමන් කරමින් දිශාවන් බබළවයි ද, ඒ තාක් අවකාශය “සහ ශ්‍රී ලෝක ධාතුව” යැයි කියනු ලැබේ. එම ලෝක ධාතුවෙහි හිරු දහසක් ඇත. සඳු දහසක් ඇත. මහාමේරු පර්වථ දහසක් ඇත. දඹදිව් දහසක් ඇත. අපර ගොයාන දහසක් ඇත. උතුරු කුරු දිවයින් දහසක් ඇත. පූර්ව විදේහ දහසක් ඇත. මහ සමුද්‍රයෝ හාරදහසක් ඇත. මහා රාජ්‍යයන් හාරදහසක් සහ චතුම් මහා රාජික දහසක්, තව්තිසා දෙව්ලොව දහසක්, නිම්මාන රති දහසක්, පරිනිම්මිත වසවර්ති දහසක්, බ්‍රහ්ම ලෝක දහසක් ඇත. මෙය “චූලනිකා සහ ශ්‍රී ලෝක ධාතුවයි.”

ආනන්දය, මෙවන් චූලනිකා සහ ශ්‍රී ලෝක ධාතු දහසක් එකට ගත් විට “ද්වි සහශ්‍රී ලෝක ධාතුව” හෙවත් “මධ්‍යම සහ ශ්‍රී ලෝක ධාතුව” සෑදී ඇත. මෙවැනි ද්වි සහ ශ්‍රී ලෝක ධාතු දහසක් එකට ගත් විට “ත්‍රී සහශ්‍රී ලෝක ධාතුව” හෙවත් “මහා සහශ්‍රී ලෝක ධාතුව” ලැබෙයි……..

බුදුරජාණන් වහන්සේ විශ්වය පිළිබඳව චූලනිකා සූත්‍රයේදී එසේ විස්තර කර තිබෙනවා. මේ අනුව “ශ්‍රී සහශ්‍රී ලෝක ධාතුව” හෙවත් “මහා සහශ්‍රී ලෝක ධාතුවට”, සහ ශ්‍රී ලෝක ධාතු වැනි සක්වළයන් 1000 x 1000 x 1000 හෙවත් කෝටි සියයක් ඇතුළත් විය යතුය. මෙය ධර්මයේදී දැක්වෙන්නේ කෝටි ලක්ෂයක් ලෙසයි.

“සිබී” බුදුරජාණන් වහන්සේගේ අග්‍ර ශ්‍රාවක වූ “අභිභූ” මහ රහතන් වහන්සේට සහශ්‍රී ලෝක ධාතුවකට ඇසෙන සේ ධර්මය දේශනා කළ හැකි පරිදිම බුදු වරයෙකුට එවැනි සක්වළ ලක්ෂයක් ඉක්මවා ධර්ම ඝෝෂා කළ හැකි බව මින් සනාථ වෙනවා.

නවීන විද්‍යාව විශ්වය විස්තර කර ඇත්තේ කෙසේද?

බුදු දහම යනු භෞතික විද්‍යාව සමඟ කිසිසේතම සැසඳිය යුතු දහමක් නොවේ. බුද්ධ ධර්මයට සම කළ හැකි කිසිඳු විද්‍යාවක් මිහිපිට නොමැත්තේ අවිද්‍යාව නසන එකම විද්‍යාව බුදු දහම නිසායි.

නමුත් නවීන විද්‍යාවන් මේ වන විට ක්‍රමයෙන් විශ්වයේ පැවැත්ම ගැන ගවේෂණය කරමින් සිටිනවා. අපි හැමෝම නූතන විද්‍යාව වහලුන් බවට පත්වී අවසන් නිසා භෞතික විද්‍යාව විශ්වය පිළිබඳව පලකරන මත බුද්ධ වචනය සමඟ සසඳා බැලීම තරමක් වැදගත් වෙනවා. මොකද කර්මය, පුනර්භය, දෙව්ලොව, අපාය, පිළිගන්නේ නැති උදවිය එතකොටවත් විශ්වාස කරාවි බුද්ධ වචනය තරම් සත්‍ය උතුම් වචනයක් මිහිපිට නැත යන වග.

බුදුන් වහන්සේ දේශනා කළ සහශ්‍රී ලෝක ධාතුව ගැන සිතන විට එය අප ජීවත් වන Galaxy හෙවත් ක්ෂීර පථය වගෙයි නේද? ද්වි සහශ්‍රී ලෝක ධාතුව ක්ෂීර පථ වැනි මන්දාකිණි දහස් ගණනක් එකතු වී සෑදෙන Local Super clusters වගෙයි නේද?

ත්‍රී සහශ්‍රී ලෝක ධාතුව මහා සහශ්‍රී ලෝක ධාතුව යනු අපට ගවේෂණය කළ හැකි උපරිම සීමාව වන Observable Universe එක වැනි ප්‍රදේශයක් නේද?

බුදුරජාණන් වහන්සේ ත්‍රී සහශ්‍රී ලෝක ධාතුවෙන් ඔබ්බට “සිව් සහශ්‍රී ලෝක ධාතුවක්” ගැන විස්තර නොකළේ එය අපට ප්‍රායෝගික නොවූ නිසා වන්නට පුළුවන්. නමුත් සම්මා සම්බුදු බුදුවරුන්ට එම සීමාවෙන් එපිට වස්තූන්ද ගෝචර වූවා විය හැකිය.

විශ්වයේ එකවර පහළ වන්නේ එක් බුදුවරයෙකු පමණයි. නමුත් එක් සම්මා සම්බුදුවරයෙක් පිරිණිවන් පානා මොහොතේදී ත්‍රී සහශ්‍රී ලෝක ධාතුවෙන් හෝ විද්‍යාවෙන් විස්තර කරන Observable Universe එකෙන් එපිට තවත් බුදුවරයෙකු පහළ වනවා ඇති.

මේ සා විශාල විශ්වයේ මනුෂ්‍ය ආත්මයක් ලබා ඉපදීම කොතරම් දුර්ලබද?

විශ්වය කොතරම් විශාලද යන්න දැන් ඔබට හොඳින් වැටහෙනවා නේද? අප ජීවත් වන ක්ෂීර පථයේ පමණක් පෘථිවිය වැනි ග්‍රහ වස්තු අවම වශයෙන් බිලියන 100 ක් වත් තිබිය යුතු යැයි විද්‍යාඥයින් තර්ක කරනවා. මින් ග්‍රහ ලෝක බිලියන 30 ක පමණ පෘථිවියේ මෙන් ජීවය හට ගත හැකි ලෝක තිබිය හැකියි. මෙම ග්‍රහලෝක වල හට ගන්නා ජීවය ඒවාටම ආවේණික වූ විවිධාකාර ඒවා විය යුතුයි.

සම්භාවිතාව අනුව ගත් කළ එලෙස ජීවය පැවතිය හැකි ග්‍රහ ලෝක අතුරින් අඩුම තරමින් ග්‍රහ ලෝක මිලියන ගණනකවත් මනුෂ්‍යයන්ට සමාන ජීවීන් සිටිය යුතුයි. ඉන් ග්‍රහ ලෝක දහස් ගණනකවත් හරියටම අපි වැනිම එක සමාන බුද්ධිමත් මනුෂ්‍යයන් සිටින ලෝක තිබිය යුතු බව විද්‍යාඥයින් මත පළ කරනවා.

“පෑන්ස්පර්මියා” යන මතයෙන් විද්‍යාව පවසන්නේද විශ්වය පුරා ග්‍රාහක සහ වල්ගා තරු ඔස්සේ “ජීවය” විශ්වය පුරා ග්‍රහ ලෝක අතර බෝවෙමින් පැතිර යන බවයි.

ධර්මය අවබෝධ කර ගත හැකි මට්ටමේ බුද්ධියක් සහිත ජීවියෙක්ව ඉපදීම කොතරම් අහම්බයක්ද කියලා මින් ඔබට වැටහෙනවා නේද? ලෝක කෝටි, ප්‍රකෝටි ගණනක උපදින ජීවින් අතුරින් මනුෂ්‍ය ලෝකයක මනුෂ්‍යයෙක් වී උපත ලැබීම ඉතාමත් දුර්ලබයි. එවැනි මනුෂ්‍ය ලෝක අතුරිනුත් සම්මා සම්බුදුවරුන් පහළ වන්නේ කල්ප ලක්ෂ ගානකට වරක් පමණයි. එවැනි බුදුවරයෙක් යම් ග්‍රහ ලොවක පහළ වී සද්ධර්මය දේශනා කොට බුද්ධ සාසනයක් පවතීද? එම කාලය තුළ ඔබත් මනුෂ්‍ය ආත්මයක් ලබා බෞද්ධයකු වී උපදී ද එය සිතා ගැනීමත් නොහැකි තරම් දුර්ලබයි නේද?

මෙසේ බැලූ විට ගෞතම බුදුරජාණන් වහන්සේ දේශනා කළ ධර්මය ඇසීමට වාසනාව ලැබූ අප කොතරම් භාග්‍යවන්තද?

ඔබට තවත් මනුෂ්‍යයෙකු ජීවත් වීමට ඉතිරිව ඇත්තේ වසර 10, 20, 30, 40, වැනි සුළු කාලයක් විය හැකිය. ඇතැම් විට තව දින කිහිපයක් හෝ මොහොතක් විය හැකිය. සද්ධර්මය ශ්‍රවණය නොකොට ධර්මයට අනුව ජීවිතය නොපිහිටුවා ආර්ය අශ්ඨාංගික මාර්ගයේ ගමන් නොකොට ඔබ චතුරාර්ය සත්‍ය අවබෝධ කර ගැනීම පසෙකලා ගත කරන සෑම තත්පරයක්ම කල්ප කොටි ගානක් වටිනා කාලයක් බව හොඳින් තේරුම් ගන්න. චතුරාර් සත්‍ය අවබෝධය මේ ආත්මයේදී මහ හැරුණොත් නැවත විශ්වයේ ලෝක ධාතු කොටි ගණනක කල්ප කෝටි ගණනක් සසර ගෙවා නැවත බුදුවරයෙක් පහළ වන සමයක මනුෂ්‍යයෙක් වී උපදින තෙක් ඔබට ඉපදෙමින් මැරෙමින් දුක් වීමට සිදුවනු ඇත.

Nirman Kodithuwakku – “Vidarshana” Magazine – 2015 July – Dec

ජීවිතය ජය ගන්න

nirman kodithuwakku sinhalapediaජීවිතය කියන්නෙ දීර්ඝ ගමනක්. අපි හැමෝම මේ ගමන යන්නේ දහසකුත් ආශාවන්, බලාපොරොත්තු හිතේ පොදි බැඳගෙන. නමුත් ජීවිතය සඳහා ගමන් කළ යුතු මාර්ගය විවිධ අභියෝග, බාධක, කම්කටොළු වලින් පිරී පවතිනවා. මේවා අතරින් ආර්ථික ප්‍රශ්න, සාමාජීය ප්‍රශ්න සහ පවුල් ප්‍රශ්න ප්‍රධානයි.

මේ නිසා ගොඩක් අය කියන්න පුරුදු වෙලා ඉන්නවා මේ ජීවිතය කිසිම තේරුමක් නැති අසුන්දර දෙයක් කියලා. නමුත් එය අසත්‍යක්. ඔබේ ජීවිතය සුන්දර ද, අසුන්දර ද, යන බව තීරණය වන්නේ ඔබ ජීවිතය දෙස බලන ආකාරයටයි.

නිසල මුහුදකට කවදාවත් දක්ෂ නාවිකයෙක් බිහි කරන්නට බැහැ. මුහුද වඩාත් රළු වන තරමටම තමයි එම සයුර තරණය කරන නාවිකයා වඩාත් පරිණත වන්නේ. ජීවිතයත් මේ මහ සයුර වගේම තමයි. බාධක, සහ කම්කටොළු වැඩිවෙන තරමටම තමයි අපිත් පරිණත වෙන්නේ.

ජීවිතයේ ඔබට මුහුණදීමට ඇති ගැටළු සහ බාධක සියල්ලක්ම අභියෝග කරගන්න. ඒවාට මුහුණ දෙමින් ඉදිරියට යන ඔබට ආපසු හැරී බලන විට ඔබ ගැනම ආඩම්බර හිතේවි. ඔබේ ජීවිතය ගොඩක් සුන්දර බව ඔබටම දැනේවි, හොඳින් වැටහේවී.

ජීවිතය නමැති, චන්ඩ මාරුත වලින් පිරි රළු සයුරට සිනා සෙමින් මුහුණ දෙමින් සාර්ථකව තරණය කරන්නට මෙම සඟරාව ඔබේ පවුලේ සැමට යාත්‍රාවක් වේවායැයි මම ඉමහත් විශ්වාසයෙන් යුතුව ප්‍රාර්ථනා කරමි.

Editorial: Nirman Kodithuwakku – “Yathraa” Magazine 2015 Jun – Dec

මාතර කැක්කුම සහ මාතර Today

nirman matara sinhalapediaමාතර අයට මාතර පිළිබඳව තිබෙන්නේ පුදුමාකාර කැක්කුමකි. වෙන අය මෙන් නොව මාතර උදවිය ලෝකෙ කොහේ ගියත් ගම මාතර යැයි පැවසීමට නොපැකිලෙන්නේ මෙම මාතර කැක්කුම නිසාය. එහෙමත් නැත්නම් මාතර උණ නිසාය. වෙන අය බොරුවට ‘අපි කොළඹ’ යැයි පැවසුවත් මාතර අය නම් කටපුරා අපි මාතර යැයි කියන්නේ පුදුමාකාර ආඩම්බරයකිනි. මාතර අයට ලෝකෙ කොහේ ජීවත් උන්ත්, මාතර තරම් වැටිලා ඉන්න හොඳ තැනක් මේ මිහිපිට තවත් නොමැත.

මාතර කැක්කුම පිළිබඳ මා මෙතරම් කතාකරන්නේ මාතර Today සඟරාවත් මාතර කැක්කුමත් අතර ඇති පුදුමාකාර සම්බන්ධතාවය නිසාය. සැබවින්ම මාතර Today යනු මාතර කැක්කුමෙන් උපන් ප්‍රතිඵලයකි. ඒ ප්‍රාදේශීය පුවත්පත්  ශ්‍රී ලාංකිකයන්ට සිහිනයක් වූ සමයක මාතර Today සඟරාව බිහිවීමට ධෛර්ය ලබා දුන්නේද අප තුළ තිබූ මාතර කැක්කුම නිසාය.

දිගු නිහැඬියාවකට පසු නැවතත් මාතර Today එළි දකින මෙම සතුටුදායක මොහොතේ දරාගත නොහැකි ශෝකයක් ද ගැබ් වී තිබේ. ඊට හේතුව මාතර Today ආරම්භයේ සිටම මාතර Today වෙනුවෙන් ලිපි සපයමින් සෑම මාතර Today සඟරාවක් වෙනුවෙන් දාඩිය හෙළු පසන් රාමවික්‍රම නම් ඒ සුන්දර මිනිසා අප අතරින් වෙන් වීමයි. මා දුටු මිනිසුන් අතරින් මාතර ගැන ලොකුම කැක්කුමක් තිබුණේ පසන් රාමවික්‍රමටයි. කීර්තිමත් මාධ්‍යවේදියෙකු හා ඉතාමත් අව්‍යාජ, නිහතමානී ගති පැවතුම් තිබූ පසන් රාමවික්‍රමගේ මුළු ජීවිතයම වූයේ මාතරයි. මාතර Today සඟරාව නැවත මුද්‍රණය නොකෙරී තිබුණු සමයක සඟරාව නැවත මුද්‍රණය කරන ලෙසට අප හට වැඩිපුරම බල කළේ පසන් ය. සඟරාව මුද්‍රණය නොකලද මාතර පිළිබඳව  විවිධාකාර ලිපි රැගෙන නිරන්තරයෙන් මා හමුවීමට ඔහු පැමිණියේ සඟරාව නැවත මුද්‍රණය කිරීමට මා ධෛර්යමත් කිරීමටය. හදිසි අනතුරකින් ඔහු මියයාමට පෙර දිනයේද අහම්බෙන් මහදී හමු වූ පසන් මට පැවසූ අන්තිම වදන වූයේද, “මිස්ට නිර්මාන් අපි කොහොමහරි පත්තරේ කරමු” යන්නයි.

දිගු නිහැඬියාවකට පසු නැවතත් මාතර Today මෙලෙස එළි දකින්නේ සැබවින්ම පසන් රාමවික්‍රම තුළ තිබූ මාතර කැක්කුමේ ප්‍රතිඵලයක් ලෙසය. මාතර Today සඟරාව ගැන මටත් වඩා කැක්කුමක් තිබූ පසන් රාමවික්‍රම නම් ඒ අව්‍යජ මිනිසාට මෙවර මාතර කලාපය මම පුද කර සිටිමි.

පසන් වැනි මාතරට ආදරය කරන මාතර ගැන කැක්කුමක් තියෙන මිනිසුන් සිටින තාක්කල් මාතර Today සඟරාව ද ජීවමාන වනු ඇත.

Editorial: Nirman Kodithuwakku – Matara Today 2015 April – June

අල්ලපු ගෙදර බල්ලා..

මේක සත්‍ය සිද්ධියක්…

මගේ යාලුවෙක්ගෙ ගෙදර හිටියලු හොඳ වටිනා ඇල්ශේෂන් බල්ලෙක්. අල්ලපු ගෙදරත් හිටියලු ඒ වර්ගෙම ඇල්ශේෂන් බැල්ලියෙක්. ඉතින් අල්ලපු ගෙදර අන්කල්ගෙන් හරි වදේ ලූ මිනිහට බල්ලා දෙන්න කියල බැල්ලිට cross කරන්න. හැබැයි ඉතින් බල්ලා තාම පැටියා හින්දා යාළුවා කැමති නෑ දැන්ම ඌ cross කරන්න. ඒ හින්දා පොර හැමදාම වැඩේ මග අරිනවා.

ඒ අන්කල්ට හිටියලු ලස්සන දුවෙක්. කෙල්ල ලස්සන නිසා ගමේ හිටපු මදාවියෙක් කෙල්ලගේ පස්සෙන්ම එනවලු. ඌ ගෙදර ගාවට එන්නේ තැඹිලි පාට කාර් එකකලූ කෙල්ල බලන්න. අන්කල්ට හොඳටම මල පැනළලු හිටියේ මේකට. ඕක හම්බ වුනු වෙලාවක අල්ලගන්නම් කිය කියා අහුවෙනකම් ලූ හිටියේ කොල්ලව. මොන තාත්තද ඉතින් කැමති මදාවියෙක්ට තමන්ගේ දූ බන්දලා දෙන්න..

දවසක් අන්කල් වැඩ ඇරිලා ගෙදර එනකොට මගේ යාළුවගේ වත්තේ එක පැත්තක දාල තිබුණු යාළුවගේ තාත්තගේ වාහන ගරාජ් එකට හදන්න තැඹිලි පාට කාර් එකක් නවත්තල තිබුනලු. ඕක දැකපු අන්කල් හිතුවලු අර මදාවි කොල්ල මගේ යාළුවා හම්බ වෙන්න ඇවිත් කියල. ඕක දැකල මල මාරු වෙච්ච අන්කල් ගේට්ටුව අරගෙන යාළුවගේ ගෙදරට ආවලු. ඇවිත් කෑ ගහල කතා කරාලු යාළුවගේ නම කියල.

යාළුවා එලියට ආවම අන්කල් එක පාරටම උගෙන් ඇහුවලු මෙහෙම…

“කෝ අර බල්ලා ඉන්නවද? මම අද අවේ ඕකව බෙල්ලෙන්ම අල්ලාගෙන යන්න”

සිද්දිය නොතේරුණු මගේ යාළුවා උත්තර දුන්නලු මෙහෙම..

“ඇයි අන්කල්, බැල්ලිට cross කරන්නද?”

ඊට පස්සේ අන්කල් කියපු ටික මේ පොස්ට් එකේ දාන්න බැහැ……..  🙂

නිවන

නිවන යනු සියළුම බෞද්ධයන් විසින් පත්වීමට බලාපොරොත්තු වන සියළු දුකින් නිදහස් වූ සදාකාලික සැපය යන ධර්මතාවයයි. අප මෙම ජීවත් වන සංසාරය කුමන ස්වරූපයෙන් අත්වින්දද අවසානයේ ඒ සෑම ධර්මතාවයක්ම අවසන් වන්නේ දුකකිනි. දුක සහිත මෙම සංසාරයෙන් නිදහස් වීමට ඇති එකම මග නිර්වාණයයි. නිවන යන සංකල්පය සැබවින්ම වචනයෙන් විස්තර කළ නොහැකි අතිශය සංකීර්ණ සංකල්පයක් වන අතර නිවන යනු කුමක්ද යන්න එය අත්දැකීමෙන් පමණක් සම්පූර්ණයෙන් අවබෝධ කර ගත හැකිය.

බුදුරජාණන් වහන්සේ නිවන පිළිබඳ විස්තර කර ඇති පහත කරුණු වලින් අමා මහ නිවන් සැප කුමන ආකාරයේ සැපතක් දැයි ඔබට දළ වශයෙන් අවබෝධයක් ලබා ගත හැකිය.

  • අනන්ත සුඛ ගුණයෙන් යුක්ත වූ පරමාර්ථ වශයෙන් ඇති ධර්මතාවය නිවනයි.
  • නිවන යනු සදාකාලික ධර්මතාවයකි. එය හට ගැනීමක් හෝ අභාවයක් නොමැත. (චතුකෝටික ශුන්‍යතාවය) එනම් නිවන ඇත්තේද නැත, නැත්තේද නැත, ඇත්තේ නොවන්නේ නොවේ නැත්තේ නොවන්නේද නැත යන ශුන්‍ය තත්වයකි. (කිසිවක් නොමැති හිස් බවක් මින් අදහස් නොවේ.)
  • අවේදයිත සුඛ ලෙස හැඳින්වේ. ඉන් අදහස් වන්නේ කිසිම දෙයක් නොවිඳින තත්වයකට පත් වීම නිසා ලබන සැප යන අදහසයි.
  • නිවන යන්න මෙම ලෝකයට, වෙනත් ලෝකයකට හෝ යම් කිසි ඉසව්වකට වෙන්ව පවතින ධර්මතාවයක් නොව මුළු මහත් විශ්වයටම පවතින ධර්මතාවයකි.
  • තමා කෙරෙහි විදිය යුතු කිසිදු වෙනත් සුවයක් නැති තරමට පරම වූ සැපතකි.
  • මාර්ග ඵල ගුණයෙන් සහ ප්‍රඥාවෙන් පමණක්ම ප්‍රත්‍යක්ෂව දැකිය යුතු ධර්මතාවයකි.
  • නිවන අළුත්, පරණ ආදී වශයෙන් වෙනසක් නැත. වර්ෂ අසංඛයකට පෙර දක්නා ලද නිවනත්, වත්මන් බුද්ධ ශාසනයේදී අද්දකිනා නිවනත් මින් වසර අසංඛයකට ඉදිරියේදී අත්දකින නිවනත් එක හා සමානයි.

නිවන හි ස්වභායන් විස්තර කිරීමේදී නිරෝධ යන වචනය විශ්ලේෂණය කර බලමු. “නි” යන්නෙන් අදහස් වන්නේ නැතිවීම හෙවත් අභාවයට යාමයි. “රෝධ” යනුවෙන් අදහස් වන්නේ සිරගෙය යන අදහසයි. එනම් නිරෝධ යනු තෘෂ්ණාව නැමති සිරගෙයින් හිත නිදහස් කර ගැනීමයි. තෘෂ්ණාවෙන් සම්පූර්ණයෙන්ම නිදහස් වීම යනු නිවන් දැකීමයි. සදාකාලික විමුක්තියයි.

තත්ථ කතමං දුක්ඛ නිරෝධ අරිය සච්චං යෝ තස්සායේව තණ්හාය අසේස විරාග

නිරෝධෝ වාගේ පටිනිසිසග්ගෝ මුත්තී අනාලයෝ ඉදං චුච්චතී භික්ඛවේ

දුක්ඛං නිරෝධ අරිය සච්චං

දුක්ඛ නිරෝධ සත්‍ය යනු කවරේද යත් දුක් ඉපදීමේ හේතුව වූ තෘෂ්ණාව ඉතිරි නොවන සේ මුළුමනින්ම නැති කෙරේද, තෘෂ්ණා දුරු කෙරේද, තෘෂ්ණාව බැහැර කෙරේද, තෘෂ්ණාවෙන් මිදීමක් කෙරේද, තෘෂ්ණාව පිළිබඳ ඇල්මක් නොවේද, එය නිරෝධ ආර්ය්‍ය සත්‍යය නිවනේ සත්‍ය ස්වභාවය පෘතග්ජන මිනිසුන්ට තේරුම් ගත නොහැකි බව බුදුරජාණන් වහන්සේ තේරුම් කර ඇත.

නිවන යනු කුමක්ද යන්න නිත්‍ය වශයෙන් වටහා ගැනීම ආරම්භ වන්නේ සෝවන් ආදී මාර්ග ඵල ලැබුවොත් පමණි. නිවන යනු පරම සුවයයි. කවර කාලයකදී වත් වෙනස් නොවන ලෝකෝත්තර සුවයයි. කිසිදු දෙයක් නොවිදින සුවයක් වීම මෙහි ඇති උත්තරීතර බවයි. අප විඳින සැප දුකට පෙරලේ. නිවන යනු නොවිඳිනා සැපයක් වන හෙයින් එය නිත්‍යයි. එය සදාකාලිකයි.

බුදුරජාණන් වහන්සේ සෑම විටම උපදෙස් දුන්නේ නිවන පිළිබඳ සැක පළ නොකර නොපමාව කුසල් රැස් කර නිවන සාක්ෂාත් කර ගන්නා ලෙසයි.

**********************************************************************************************

නිවන යනු කුමක් දැයි සැක පලකළ භික්ෂූන් වහන්සේ පිරිසක් බුදුරජාණන් වහන්සේගෙන් නිවන යනු කුමක් දැයි පහදා දෙන ලෙස ඉල්ලීමක් කළ විට බුදුරජාණන් වහන්සේ ඊට ලබාදුන් පිළිතුර ඉතාමත් වැදගත්. මෙය ජර්මන් ජාතික නාට්‍යකරුවෙකු වන බර්ටෝල්ට් බ්‍රෙෂ් (Bertolt Brecht) විසින් කවියට නගා ඇති අතර එය මහාචාර්ය කාලෝ ෆොන්සේකා විසින් පහත පරිදි මනරම්ව සිංහලට නගා ඇත.

තණ්හාවේ දෝසේ, දුටු බුදුන් වහන්සේ

තණ්හාව නසා, විමුක්තිය පතා

නිවන් මග මේ යැයි පෙන්වා දුන් සේක.

ඉක්බිති දවසක්, ගෝලයෝ පිරිසක්

ඇසුවෝය හිමිගෙන්, එක්තරා පැනයක්

තණ්හාව හළ විගස, සැණකින් අප ලබන

ඔබ කියන ඔය නිවන කෙබඳුදැයි කියනු මැන.

එවිට අප සියළු දෙන තණ්හාව නසනු ඇත.

ඔබ ලොවට පිවිසීම වාගේද නිවන් සුව

ඉර මදුන් වෙලාවේ, විලක් මැද තනිවෙලා

කුසීතව පාවෙමින් සිටින්නා වාගේද

ඔබ කියන ඔය නිවන, පැහැපත් ද පියකරු ද

නොඑසේනම් එය සිත නැති කය නැති

කිසිම දෙයක් නැති දෙයක්දෝ ස්වාමීනි?

මෙය ඇසූ හිමි සඳ හෝරා ගණනක් වැඩ හිඳ

නිසලව කීවේ මෙලෙස ය,

ඔබ ඇසූ පැනයට පිළිතුරු නැත මට

එහෙත් එම දිනයේ සැන්දෑ සමයේ

බෝ රුක් සෙවනේ වැඩ සිටි සමිඳා

පැන ඇසූ සිය සිසු පිරිස ගිය පසු

එහි සිටි සෙසු දන සැම අමතාලා

දෙසූහ මේ සුළු කතාව උපමා.

දවසක් මම ගෙගයක් දුටිමි එය ගින්නට හසුව තිබුණි

රත් පැහැ ගත් ගිනි ජාලා එහි පියසින් උසට නැගුණි

එහි තුළ මම දනන් දුටිමි

දොර හැර ඔවුනට හඬගා පිටවන්නැයි මම කීවෙමි.

එහෙත් එදන සැලුණේ නැත

හදිසි බවක් පෙන්නුවෙ නැත.

එක් අයෙකුගෙ රැවුල පවා පිළිසෙද්දී ඔහු ඇසුවේ

ගෙයින් පිටත මීට හොඳද වැසි වසීද සුළඟ තදද

දැවෙන නිවෙස දමා ගොසින්

ඉන්න වෙනත් ගෙයක් තියෙනවාද?

මෙවැනි ප්‍රශ්න නොදී ඔහුට

නැවත වරක් වුණෙමි නිහඬ.

මට සිතුණා මේ දරුවන් නගන ප්‍රශ්න

නවත්තන්නේ ගින්නෙන් නැසුණාම කිය

“සත්තකින්ම ප්‍රිය දරුවනි,

යම් මිනිසෙකු පොළෝ තලේ

තැබූ දෙපා දැවෙනා තුරා

වෙන තැනකට නොයාවි නම්

ඒ දන හට සරණ යන්න

බණක් නැතිය මට කියන්න”

“එලෙසයි අප හිමි ගෞතම

පිළිතුරු දුන්නේ පෙර කල”

Nirman Kodithuwakku – “Vidarshana” Magazine – 2015 July – Dec

අංජලිකා..

මම දවසක් යාලුවෙක් එක්ක ගියා අවුරුදු කීපයකට කලින් “අංජලිකා” ෆිල්ම් එක බලන්න. ඇත්තටම ගියේ ෆිල්ම් එක බලන්නටත් වඩා ඒකෙ රගපාන පූජා උමාශංකර් බලන්න තමයි ඉතින්.

මුළු ෆිල්ම් එකම අස්වාභාවික සීන් පිරිලා. සිද්ද වන හැමදේම හරිම අස්වාභාවිකයි. චිත්‍රපටියේ ප්‍රධාන නළුවා තමයි චන්න පෙරේරා. මිනිහා ෆිල්ම් එකේ යාලු වෙන්නේ ගෙදර වැඩකාරයගෙයි වැඩකාරිගෙයි දු (අංජලිකා) එක්ක. කෙල්ල ලස්සන උනාට ඉතින් වැඩේ කේස් නේ.

චන්නගේ තාත්තට රගපාන්නේ සනත් ගුණතිලක. මිනිහා මරුමුස් පොර. වලියටම තමා ඉන්නේ. ඔන්න දවසක් චන්න (චරිතේ නම තිවංක) තාත්තා ගාවට ගිහින් කියනවා “daddy මම අන්ජලිකට ආදරෙයි, මම එයාව කසාද බඳිනවා” කියලා.

මම හිතුවේ සනත් ගුණතිලක (තාත්තා) ගෙදර බඩු මුට්ටු පෙරලලා, චන්නට උදේට කාපුවා ආපහු එන්න දෙකක් ඇනලා, අංජලිකටත් වෙඩි තියලා මරලා දාවි කියලා. ඒ උනාට හිතා ගන්න බැරී විදියට සනත්, චන්න බදා ගෙන කියනවා “ඒක පුතාගේ කැමැත්ත නං මගේ ආශීර්වාදය පුතාට තියනවා. මගේ අකමැත්තක් නෑ” කියලා.

දැන් ඉතින් මට හොදටම මළ. ඇයි යකෝ වෙන්න බැරි වැඩනේ මේකේ වෙන්නේ. මම යාලුවට කිවවා “යමන් බන් යන්න. මේක මහා විකාරයක් බන්. තාත්තා කෙනෙක් ජීවිතේට ඕකට ඔහොම එක පාරට කැමති වෙනවද? මම තාත්තා උනා නම් මුලින් ගහනවා එකක් ඕකගේ කණ පැලෙන්න” කියලා.

එතකොට මගේ යාළුවා කියපි,

පොඩ්ඩක් හිතපන් මචං.. ෆිල්ම් එක චන්න ගෙනෙ. ඉතින් කොහොමද මොන දේ උනත් සනත් චන්නට විරුද්ධ වෙන්නේ. චන්න මොනවා ඇහුවත් ඉතින් සනත්ට හා කියන්න වෙනවා”

එතකොට තමයි මටත් මතක් උනේ චන්න ෆිල්ම් එකේ ප්‍රධාන නළුවා විතරක් නොවේ, නිශ්පාදනය, අධ්‍යක්ෂණය, පිටපත සේරමත් චන්නම තමයි. ඉතින් එහෙම එකේ සනත් ට  පුලුවන්ද ඌට ඉහලින් යන්න.

සර්වඥ ධාතූන් වන්දනා කිරීමේ සැබෑ අරුත

393219_531630836854507_1996829829_nමාතර Today සඟරාව ආරම්භ කර වසර 2 ක් සපිරෙන මොහොත මාතර නගරට තවත් ඉතා ප්‍රීතිමත් පින්වත් දුර්ලභ භාග්‍යයක් උදා විය. ඒ ඉන්දියාවේ සිට බුදුරජාණන් වහන්සේගේ කපිලවස්තු ශ්‍රී සර්වඥ ධාතූන් වහන්සේලා මාතරට වැඩම කරවීම නිසාය. දින තුනක කාලයක් සැදැහැවතුන් මිලියනයකට අධික පිරිසක් සම්මා සම්බුදුරජාණන් වහන්සේගේ ධාතූන් වහන්සේලා වැඳ පුදා ගැනීමට තරම්. වාසනාවන්ත වූහ.

සැතපුම් ගණනක් දික් වූ පෝළිම් වල සිට සැදැහැවත් බෞද්ධයෝ සම්මා සම්බුදු බුදුරජාණන් වහන්සේගේ ධාතූන් වහන්සේලා වැඳ පුදා ගත්හ. නමුත් මෙහි තිබූ සුවිශේෂීම අංගය වූයේ විවිධ තරාතිරම් වල අයට විවිධාකාර පෝළිම් දකින්නට ලැබීමය.

සාමාන්‍ය දුප්පත් ජනතාව සැතපුම් කිහිපයක් අවුව – වැස්ස නොබලා පෝළිමේ පැමිණිය යුතුව තිබිණි. මාතර නගරයේ යමක් කමක් කළ හැකි පවුල් වල උදවියටත්, විවිධ ආධාර ලබා දුන් උදවියටත් VIP අවසර පත් ලැබිණි. සුපිරි ව්‍යාපාරිකයන් සහ දේශපාලඥයන්ගේ පවුල් සඳහා VVIP පෝළිම හෙවත් අමුතුම පෝළිමක්  ද විය.

එක් එක් පුද්ගලයන් පෙර කර ඇති කුසල් අනුව මේ ආකාරයෙන් පහසුවෙන් ධාතූන් වහන්සේ වැඳ පුදා ගැනීමට හැකියාව ලැබීම සාමාන්‍ය දෙයකි. නමුත් ලොව අනෙක් ආගම් වල මෙවැනි අවස්ථාවලට සම්බන්ධ වන්නේ තම තරාතිරම කුමක් වුවත් සියළු දෙනාම එකා මෙන්ය. මීට හේතුව පූජනීය වස්තූන්ට වැඳුම් පිදුම් කිරීමෙන් ආනිසංස ලැබෙන්නේ ඒ පිළිබඳව ඇති ශ්‍රද්ධාව නිසා මිස දෑත් එකතුකර එයට වැඳීමෙන් නොවන නිසාය.

ඇතැම් අය පවසා සිටියේ තමන් පැය ගණනක් පෝළිමේ සිටියත් හරියට ධාතූන් වහන්සේ දැක ගැනීමටවත් අවස්ථාවක් නොලැබුණු බවය. ඇතැම් රෝගාතුර පුද්ගලයන් සහ පෝළිමේ යන්නට අමාරු වයසක උදවිය තමන්ට බුදු රජාණන් වහන්සේගේ ධාතූන් වහන්සේ වැඳ පුදා ගැනීමට තිබූ අවස්ථාව නොලැබී යාම ගැන ශෝක වේ. නමුත් එය එතරම්ම කණගාටු නොවිය යුතු කාරණයක් විය යුතු නොවන්නේ සම්මා සම්බුදු බුදුරජාණන් වහන්සේගේ ශ්‍රී සර්වඥ ධාතූන් වහන්සේලා දිවයින පුරාවැඩ වාසය කරන බැවිනි.

බුදුරජාණන් වහන්සේගේ ශ්‍රී දන්ත ධාතූන් වහන්සේ වැඩ සිටින්නේ මහනුවර දළදා මාළිගාවෙහි ය. මහියංගනය චෛත්‍යයෙහි බුදුරජාණන් වහන්සේගේ කේෂ ධාතූන් ද, මාතර සිට කිලෝ මීටර් 100 ක් පමණ දුරින් පිහිටි තිස්සමහාරාම චෛත්‍යයෙහි බුදුරජාණන් වහන්සේගේ වටිනාම ධාතූන් වහන්සේ වන ලලාට ධාතූන් වහන්සේ වැඩ සිටී. එම චෛත්‍යයේම වැඩ සිටි දන්ත ධාතූන් වහන්සේනමක් පසු කාලීනව සෝමාවතිය චෛත්‍යට වැඩම කරවා ඇත. මාතරට සමීයෙන්ම පිහිටා ඇති තිස්සමහාරාමයත්, කතරගම කිරිවෙහෙරත් බුද්ධ සිරිපා ස්පර්ශය ලබූ මහා පින්බිම්ය. තිස්සමහාරාම චෛත්‍යය වෙත ගොස් කාවන්තිස්ස රජතුමා විසින් ගොඩ නැගූ මුල් චෛත්‍යයේම පාදම මත හිස තබා ඔබ ලලාට ධාතූන් වහන්සේ වැඳ නමස්කාර කරයි නම් එය හරියටම බුදුන් වැඩ සිටි තැනටම ගොස් උන් වහන්සේගේ ශ්‍රී පාද නමස්කාර කළා යැයි යන හැඟීමක් යැයි මට නම් හැඟේ. මේ නිසා කපිලවස්තු ධාතූන් පිදීමට හරි හැටි අවස්ථාවක් නොලද ඕනෑම අයෙකුට ඉතාමත් පහසුවෙන් ශ්‍රද්ධාවෙන් තිස්සමහාරාමය පිදිය හැකිය.

පුලීනථුපිය තෙරුන්වහන්සේගේ කතා පුවත අපට වැදගත් කතාවක් ගෙනහැර පායි. බුදුවරයෙක් පහළ නොවූ කාලයක “නාරද” නැමති ආගමික නායකයෙක් ලෙස හිමාල ප්‍රදේශයේ උපන් පුලීනථුපිය මහරහතන් වහන්සේට අනුගාමිකයෝ රාශියක් වන්දනා මාන කළහ. දිනක් මෙම නාරද නම් තාපසයාට කල්පනා වූයේ සියළු දෙනාම තමාට නමස්කාර කරන ආකාරයෙන්ම තාමටද තමාට වඩා උසස් පුද්ගලයෙකුට වැඳ නමස්කාර කළ හැකිනම් වටීය යන්නයි. මේ සඳහා ගැලපෙන කෙනෙක් ඔහුට කල්පනා නොවූ නමුත් ලොව කලින් කළ සම්මා  සම්බුදුවරයන් සියළු කෙළෙසුන් නසා බුදු බව ලබන බව ඔහු අසා තිබිණි. තමා සිටි ස්ථානයට ආසන්නයෙන් ගලා ගිය නදිය සමීපයට ගිය නාරද තවුසා දෑතින් වැලි ගොඩ ගසා දාගැබක ආකාරයෙන් සකස් කර මෙම දාගැබ එම අනන්ත ගුණ සහිත සම්මා සම්බුදුවරයන්ට පූජා වේවා යැයි ප්‍රාර්ථනා කර වැඳ නමස්කාර කළේය. සම්මා සම්බුදුවරයන්ගේ ධාතූන් වහන්සේලා මෙම දැගැබෙහි වැඩ වාසය කරනවායැයි ප්‍රාර්ථනා කළ ඔහු මිය යන තෙක්ම එම දාගැබ වටා අතු ගා පිරිසිදු කර පුද පූජා පැවැත්වීය. අපගේ ගෞතම බුදුරජාණන් වහන්සේගේ කාලයේ නැවත උපත ලැබූ මෙම නාරද නම් තවුසා ඉහත තමා කළ පුණ්‍ය ක්‍රියාව හේතුවෙන්ම බුදුරජාණන් වහන්සේ දැක බණ ඇසීමටත් පළමුව තම දෙමාපියන් විසින් බුදුරජාණන් වහන්සේ ගැන පවසන දෑ අසා ඒ ගැන පැහැදී වයස අවුරුදු හතේදීම ගිහිගෙය තුළදීම රහත්භාවය ලැබීමට තරම් වාසනාවන්ත විය. පසුව පුලීනථුපිය මහරහතන් වහන්සේ ලෙස ප්‍රසිද්ධියට පත් එම තෙරුන් වහන්සේට තම දෑතින් චෛත්‍යයක් ගොඩනගා එදා කළ ප්‍රාර්ථනය නිසා පූර්වනිවාසානුස්මෘති ඥාණය ද ලැබීය. එම ඥාණයේ බලයෙන්ම තම පෙර ආත්මභවයේ තමා කළ මෙම කුසලට වැදෑරූ පුලීනථුපිය මහරහතන් වහන්සේ පවසා සිටියේ “අවන්ක ශ්‍රද්ධාවෙන් යම් අයෙක් බුදුන් වඳින්නේනම් එයට අවශ්‍ය වන්නේ ධාතූන් වහන්සේලා නොව තමා තුළ තිබෙන ශ්‍රද්ධාව පමණක් වන බවයි. එය මහා සැප සම්පත් ලබා දෙන කුසලයක් වන නමුත් එම සැප සම්පත් බලාපොරොත්තුවෙන්ම යමෙක් ධාතූන් වහන්සේලා වැඳ නමස්කාර කරයි නම් එම කුසලයෙහි එතරම්ම ආනිසංස නොමැති බවත්, පුලීනථුපිය මහරහතන් වහන්සේ වදාරා ඇත.”

පුලීනථුපිය මහරහතන් වහන්සේගේ කතා පුවතින් අපට පෙනී යන්නේ කුසලය රඳා පවතින්නේ වෙන කිසිඳු සාධකයක් මත නොව තමා තුළ ඇති ශ්‍රද්ධාව නිසාම පමණක් වන බවයි. අපි පා ගමනින්ම ගොස් සිරිපා වන්දනා කරන්නේ, යාපනයේ දමිළයන් පා ගමනින්ම කතරගම දෙවියන් නැමදීමට පැමිණෙන්නේ මෙම ශ්‍රද්ධාව නිසයි. මේ නිසා අව්ව – වැස්ස නොබලා තෙරපෙමින්, අසීරුවෙන් කපිල වස්තුපුර ධාතූ වන්දනාමාන කළ පුද්ගලයා ලැබූ ආනිසංස මහත්ය. එසේ ධාතු වන්දනාවේ යන සැදැහැවතුන්ට නන් අයුරින් සංග්‍රහ කළ වැසිකිළි පහසුකම් ආදිය ලබා දුන් දානවන්තයන්ද ඒ හා සමානම මහත්ඵල වූ ආනිසංස ලබා ඇත. මෙම බල පුළුවන්කාර කමින් හෝ හොරෙන් පෝළිම මැදට රිංගා ධාතූන් වහන්සේ වන්දනාමාන කළ අය කොතරම් අකුසලයක් රැස් කර ගත්තේ දැයි ඔවුන් කල්පනා කර බැලිය යුතුය. බෞද්ධයන් සැම විටම මතක තබා ගත යුතු වන්නේ බුදුරජාණන් වහන්සේ අපට උගන්වා ඇත්තේ කුසල් – අකුසල් ආදී සෑම කර්මයකටම එකම හේතුව වන්නේ අපගේ චේතනාව පමණක්ම වන බවය.

VIP යනු Very Important Person යන අර්ථයයි. මට තේරෙන ආකාරයට නම් මෙවැනි සර්වඥ ධාතු ප්‍රදර්ශනයක දී VIP ප්‍රවේශයක් ලබා දිය යුතු වන්නේ වයස අවුරුදු 60 ට වඩා වැඩි, විවිධ රෝගබාධ නිසා පෝළිමේ පයින් යා නොහැකි පුද්ගලයන්ට වන බවයි. අපගේ සම්මා සම්බුදු බුදුරජාණන් වහන්සේගේ ශ්‍රී ධාතූන් වහන්සේලා ඉදිරිපිට අන් සියළු දෙනාම පෘථග්ජන බෞද්ධයන් ය.

බුදුරජාණන් වහන්සේ ධාගැබ් ඉදිකර තම සර්වඥ ධාතූන් වහන්සේලාට වන්දනාමාන කිරීම සඳහා අවසර ලබා දුන්නේ සර්වඥ ධාතූන් වහන්සේලා වඳින සැදැහැවතුන් තුළ ඇතිවන බුද්ධාලම්භන ප්‍රීතිය නිසා ඔවුන් තව තවත් කුසල් රැස් කිරීමට පෙළඹෙන බැවිනි. මෙම නිසා ඔබ අඩුම තරමින් පස් පවින් වත් වැළකෙන්නේ නැති නම් සර්වඥ ධාතූන් වහන්සේලා වන්දමාන කළ පමණින් ඔබට සෙත සැලසේ යැයි යමෙකු සිතයි නම් එය මෝහයේ ලක්ෂණයකි. සර්වඥ ධාතූන් වහන්සේලා වැඳීමට පොරකන සැදැහැවතුන් අට සිල් කෙසේවෙතත් අඩුමින් තරමින් පන්සිල්වත් රකීනම් තමා කළ ක්‍රියාවෙහි ආනිසංස ලැබිය හැකිය.

කළාතුරකින් වැඩම කරවිය හැකි කපිලවස්තු ධාතූන් වහන්සේලා ලක්දිවට වැඩම කරවීමට පියවර ගැනීම පිළිබඳව ජනාධිපති තුමාට අපගේ ගෞරවය පුදකරමු. එම අවස්ථාවෙන් කොටසක් මාතර නගරයටද ලබා ගෙන එම වැඩ සටහන අලංකාරව සංවිධානය කළ කොටිකාගොඩ රජමහා විහාරාධිපති වහන්සේටත්, ඒ වෙනුවෙන් අවන්ක ශ්‍රද්ධාවෙන් දිවා රෑ වෙහෙසී වැඩ කළ සැමදෙනාටත්, සියළුම ශ්‍රද්ධාවන්ත පින්වතුන් සම්මා සම්බුදු බුදුරජාණන් වහන්සේගේ ධාතූන් වහන්සේ වැඳ රැස් කර ගත් සියළුම කුසල් අනුමෝදන් වේවා යැයි මම ප්‍රාර්ථනා කරමි.

Editorial: Nirman Kodithuwakku – Matara Today 2012 Sep – Dec

 

සම්බුද්ධත්ව ජයන්තියට පසු…

බුදු දහම යනු මීට වසර 2600 කට ඉහත බුදු රජාණන් වහන්සේ විසින් අවබෝධ කරගත් ධර්මයකි. ඇතමෙක් මෙය ආගමක් ලෙස හැඳින් වුවද මා දන්නා විද්‍යාව අනුව බුද්ධ දර්ශනය යනු නූතන විද්‍යාවටත් ඔබ්බට ගිය විශය ක්ෂේත්‍රයකට සීමා නොවූ මුළු විශ්වයේම ක්‍රියාකාරීත්වය පැහැදිලි කරන පරිපූර්ණ විද්‍යාවකි.

තේරවාද බුදු දහමේ මධ්‍යස්ථානය ලෙස ශ්‍රී ලංකාව සැලකෙන්නේ බුදුන් උපන් දේශයෙන් පවා බුදු දහම වියකී යන විට එය දිවි හිමියෙන් රැක ගත්තේ සිංහලයන් වූ බැවිනි. මේ සඳහා ප්‍රධානතම කරතව්‍යක් සිදු කළේ අපගේ සංඝයා වහන්සේ විසිනි.

අන්තවාදී අන්‍ය ආගමික බලවේග විසින් අපගේ බුදු දහම විනාශ කරන බවට මේ දින විශාල කතා බහක් ගොඩ නැගී ඇත. ඇතැම් බෞද්ධයන් සහ භික්ෂූන් මෙයට විරුද්ධත්වය පළකරමින් රූපවාහිනී කැමරා ඉදිරි පිට යටිගිරියෙන් කෑමොර දෙන්නේ ඔවුන් දිවි පුදා බුදු දහම බේරා ගන්නා බවට සපත කරමිනි.

නමුත් අපගේ බෞද්ධයන් වටහා නොගත් සත්‍ය වන්නේ යමක් විනාශ කිරීමට වඩාත් පහසු වන්නේ පිටත සිටින සතුරාට නොව ඇතුලත සිටි මිතුරාටය යන කාරණයයි. ශ්‍රී ලංකාවේ තේරවාදී බුදු දහම අන්තවාදීන්ගෙන් බේරා ගැනීමට නොව ඉතිරි වී ඇති බුදු දහම ඉදිරියට පවත්වාගෙන යෑමට වත්මන් සංඝ ශාසනයට කොතරම් හැකියාවක් ඇතිද යන්න මේ නිසා පළමුව විමසා බැලිය යුතුය. මෑතකදී මහාචාර්ය සරත් විජේසූරිය මහතා මේ පිළිබඳ කළ ප්‍රකාශයක් මහත් ආන්දෝලනයකට ලක් විය.

මාගේ පුද්ගලික මතයක් වන්නේ ශාසනය රැකීමට භාරගත් සංඝයා වහන්සේලා බහුතරයක් නිසා අද වන විට ශාසනය විශාල පරිහානියකට ලක් වී ඇති බවයි. අද බහුතරයක් වූ සංඝයා වහන්සේලාගේ හැසිරීම සාමාන්‍ය ගිහි ජීවිතයක විනයෙනුත් ඔබ්බට ගිය ජීවිත බවට පත් වී ඇත. මේ පිළිබඳ මා තර්ක නොකරන්නේ මේ සියල්ල සඳහා ඕනෑ තරම් උදාහරණ පුද්ගලිකවම දන්නා බැවිනි. නමුත් මේ පිළිබඳ අද සමාජයේ කතා කිරීම පවා බෞද්ධ විරෝධියෙක් ලෙස හෝ “ජාත්‍යන්තර බලවේගයක අතකොළුවක්” ලෙස හංවඩු ගැසීමට ප්‍රමාණවත්ය.

බුදු දහම වෙනුවෙන් අපිරිමිත සේවයක් කළ බලන්ගොඩ ආනන්ද මෛත්‍රීය මාහිමිපාණන් අපවත් වීමට ප්‍රථම ප්‍රධාන පෙළේ සංඝයා වහන්සේ පිරිසක් සමඟ වූ සංවාදයකදී යෝජනා කර තිබුණේ ධර්ම සංඝායනාවක් නැවත සිදු කළ හැකි නම් ඉතා යෝග්‍ය බවයි. මෙහිදී අනෙක් සංඝයා වහන්සේලා පෙන්වා දී ඇත්තේ අවසන් ධර්ම සංඝායනාවෙන් පසු නැවත ධර්ම සංඝායනාවක් සිදු කිරීමට තරම් ධර්ම පරිහානියක් සිදු වී නොමැති බැවින් වර්ථමානයේ එවැනි අවශ්‍යතාවක් නොමැති බවයි. නමුත් පිරිහී යන සංඝ සමාජය සුරැකීමට සංඝයා වහන්සේලාගේ විනය සංඝායනාවක් ඉක්මනින් සිදු කළ යුතු බවත්ය. මෙහිදී මදහසක් පෑ බලන්ගොඩ ආනන්ද මෛත්‍රීය හිමියන් වදාරා තිබුණේ තමන් වහන්සේටද සැබවින්ම අවශ්‍ය සංඝ විනය සංඝායනාවක් සිදු කිරීම නමුත් තමන් වහන්සේ එසේ පැවසීම වුවද වර්ථමාන සංඝ සමාජයේ ආන්දෝලනාත්මක ගැටළුවකට හේතුවක් වන බැවින් මෙය ධර්ම සංඝායනාවක් ආකාරයෙන් ඉදිරිපත් කළ බවයි. මින් පැහැදිලි වන්නේ උන්වහන්සේ වුවද සංඝයා වහන්සේලාගේ විනය සංශෝධනයක් පිළිබඳ ඝෘජුව කතා කිරීමට බිය වූ බවයි.

වර්ථමාන සංඝ සමාජයේ විවිධ හාමුදුරුවරුන් සිටිති. මොවුන් සමහරක් ටියුෂන් හාමුදුරුවන්ය. ඇතැමුන් රූපවාහිනී හා පුවත් පත් දැන්වීම් පළකරමින් වශී ගුරුකම් සහ සාත්තර කියන ගුරුන්නාන්සේලාය. ව්‍යාපාරික සංඝයා වහන්සේලාද ශාසනයේ බහුලය. මා දන්නා එක් හිමි නමකගේ ප්‍රධාන ව්‍යාපාරය දායකයන්ගේ මුදලින් තායිලන්තය වැඳ පුදා තායිලන්තයේ සිට සිවුරු පාත්‍ර ආනයනය කිරීමයි. ඇතැම් පන්සල් සතු දේපල සම්පූර්ණයෙන් පාලනය වන්නේ එහි නායක හිමිවරුන්ගේ සිතැඟි පරිදිය. පන්සලට ලැබෙන ආදායමට සිදු වන්නේ කුමක් දැයි පොඩි හාමුදුරුවන් වත් දන්නේ නැත. නායක හාමුදුරුවෝ හිතවත් කර ගත හැකි නම් බොහෝ පන්සල් වලින් පොඩි ගානක බද්දට ඉඩම් අක්කරයක් වුවද ගත හැකිය. වර්ථමාන මාතර නගරයේ වුවද ඇතැම් පන්සල් වල ඉඩම් පර්චස් ගානට “බද්දට” දී ඇත.

තවත් චීවරධාරීන් පිරිසක් විවිධ රටාවලින් බණ කියමින් ශ්‍රාවක් සිත් දිනාගෙන වර්ථමානයේදී එක් බණක් කීමට රුපියල් 25,000 ක් 50,000 ක පමණ මුදලක් අය කරති.  මෙසේ ප්‍රසිද්ධ වන හාමුදුරුවරුන් අවසානයේ නතර වන්නේ පාර්ලිමේන්තුවේ හෝ “සෝවාන් ඵලය” අවබෝධ කර ගත්තා යැයි පවසමින්ය. වර්ථමාන පිරිවෙන් බහුතරයක් මේ වන විට සුපිරි “ටියුෂන් සෙන්ටර්” වී හමාරය. මෙම ඇතැම් ස්ථාන වල “කාඩ් මාර්ක්” කරන්නේ පොඩි හාමුදුරුවරුන්ය. ඇතැම් ධනවත් පන්සල් වල නායක හිමි වරු ගමට ධර්ම දානය දී අවසන් කොට ගමම සුඛිත මුදිත කොට පන්සලේ දේපල විකුණමින් සින්ගප්පූරුවේ හෝ ඇමරිකාවේ “ධර්ම ප්‍රචාරය” පිණිසම ඒවායේ පන්සල් තනති.

ඉහත වර්ගයේ හිමි වරුන් සිටින්නේ කොටසක් පමණි. අවන්ක චේතනාවෙන්ම ධර්ම දානයෙහි යෙදෙන, කිසිදු ලෞකික පරාමාර්ථයක් නැති හිමිවරුන් රාශියක් පිළිබඳ මා අසා ඇත. හමුවී ද ඇත. නමුත් ඔවුන් පරයා සමාජයේ විද්‍යාමාන වන්නේ ඉහත සඳහන් කළ සුළු චීවරධාරී පිරසය. යම් කිසි හිමිනමක් අවන්කව ධර්ම දානයේ යෙදේනම් උන්වහන්සේට මුහුණ දීමට ඇති බාධක අනන්තය.

කිසිදු වංචනිකයකුට ඔහු වටා එක් රැස් වන පිරිසක් නොමැති නම් තම වංචාවන් සාර්ථකව පවත්වාගෙන යාමට නොහැකිය. ඉහත වංචනික චීවරධාරීන් පෝෂණය කරන්නේ ඔබත් මාත් නියෝජනය කරන දායක දායිකා සමාජය විසින්ය. එහි ඉදිරියෙන්ම සිටින්නේ ධනවත් කාන්තාවන්ය. එවන් චීවරධාරීන්ගේ බලය නිසා ඔවුන් වටා දේශපාලන බලය, නීතිය වටවී සිටී. ප්‍රධාන පෙලේ උත්සව හා පිංකම් සඳහා ආරාධනා ලැබෙන්නේ එවන් “ප්‍රසිද්ධ චීවරධාරීන්ට” විනා සිල්වත් සංඝයාවහන්සේට නොවේ. ඇතැම් රූපවාහිනී නාලිකා මෙවැනි වංචනිකයන්ගේ ගජ මිතුරන්ය.

ඉහත ක්‍රියාකළාපයන් සමස්ථ බෞද්ධයාගේම ආගමට ඇති කැමැත්ත සහ නැඹුරුව අඩු කිරීමට ප්‍රමාණවත්ය. මෙය දකින තරුණ සමාජයද පැවිදි ජීවිතයට එක් වන්නේ එහි නියම අරුතින් නොවේ. මෙය බුදු දහමේ සුරක්ෂිත අනාගතයට ඇති ප්‍රධානතම තර්ජනයයි.

මේ පිළිබඳ හඬකි නැගීමට උවමනාවක් ඇති අයට වුවද ශ්‍රී ලංකාවේ ඇත්තේ සුබදායී පරිසරයක් නොවේ. බෞද්ධයන් රාශියක් තම ආගම හෝ ධර්ශනය අදහන්නේ කිසිදු මූලික අවබෝධයකින් තොරවය. ගමේ පන්සල ලස්සනට හා ලොකුවට තිබේ නම් ලොකු හාමුදුරුවෝ තමාට හිතවත් නම් ඒ ප්‍රමාණවත් යැයි ඔවුන් සිතති. අද 365 දවසේම 24 පැයේම බණ ඇසීම ඇතැම් විලාසිතාවක් කර ගෙන ඇත. තවත් අයට තමත් ශ්‍රද්ධාවන්ත ශ්‍රාවකයන් බව පැවසීමද විලාසිතාවක් වී ඇත.

ඉහත කාරණය පිළිබඳව වර්ථමානයේ නිර්භයව අදහස් පළකරන අය සීමිතය. ඒ අතරින් නෙත් එෆ් එම් ආයතනය , මාදුළුවාවේ සෝභිත හිමි සහ මහාචාර්ය සරත් විජේසූරියට බුදු සසුනේ අනාගතය වෙනුවෙන් මාගේ නමස්කාර පූර්වක ස්තුතිය මම පිරිනමමි. ඇතැම් රූපවාහිනී නාලිකා වල බෞද්ධ සංවාද වපත්වමින් “පණ්ඩිත” යැයි කියා ගත් පිරිසක් වත්මන් බුදු සසුනේ වර්ධනය ශ්‍රාවකයන්ගේ බෞද්ධ පිබිදීම පිළිබඳව කයිවාරු ගසන වැඩසටහන් හාස්‍ය ජනකය.

මහානායක හිමිවරුන් යනු මෙරට සංඝ සමාජයේ නායක හිමිවරුන්ය. එනම් තේරවාදී බුද්ධ ශාසන අනාගතයේ තීරණාත්මක සාධකයකි. නමුත් වත්මන් මහානායක හිමිවරුන් තමන් වහන්සේ හමුවීමට පිරිකර හිස මත තබා පැමිණෙන ඕනෑම දේශපාලන පක්ෂයක ඕනෑම තරාතිරමක දේශපාලඥයෙකුට ආශිර්වාද කොට පිරිත් නූල් ගැටගැසීමත් එම ජවනිකා රූපවාහිනී නාලිකා රාත්‍රී පුවත් වල විකාශනය වීමටත් අමතරව ශාසනයේ නියම අභිවෘද්ධිය පිණිස හෝ ආරක්ෂාව පිණිස කිසිදු වැදගත් කමක් සිදු කරයිද යන්න මා නොදනිමි. මහානායක හිමිවරුන්ය ශාසන ගැටළු පිළිබඳ අවංක වුවමනාවක් නැතිද? නැති නම් විවිධ බලවේග නිසා සංඝශාසනයේ ප්‍රශ්න වලට මැදිහත් වීමට මහානායක හිමිවරුද බියද? යන්න ගැටළුවකි.

වර්ථමාන ජනාධිපති මහින්ද රාජපක්ෂ මැතිතුමා යනු නියම සිංහල බෞද්ධ උරුමයක් ඇති සිංහල ජාතිය සහ බුදු දහම පිළිබඳ අවංක නායකයා ලෙස මම දකිමි. මා එසේ ප්‍රකාශ කරන්නේ කිසිදු දේශපාලන කෝණයකින් නොවෙයි. එබැවින් රටේ ව්‍යවස්ථාවෙන්ම විධායක බලතල හිමි එතුමන්ද මෙම කාර්යට මැදිහත් නොවේ නම් ඉන් පසු බිහිවන කිසිදු නායකයෙකු අතින් මෙය සිදුවේ යැයි මම විශ්වාස නොකරමි.

Editorial: Nirman Kodithuwakku – Matara Today 2012 June-Aug

මාතර Today හෙවත් සිහිනයක් නොවූ සිහිනය

373890_355081061176153_1844768284_nමාතර Today යනු මාගේ හෝ මාතර Today කණ්ඩායමේ සිහිනයක් යැයි පැවසුවහොත් එය සැබවින්ම අසත්‍යයකි. ජීවිතය පිළිබඳව සිහින රාශියක් දුටු මා කෙදිනකවත් මාතරට පත්තරයක් එළි දැක්වීමට සිහින මැවූයේ නැත. එය සිදු වූයේ අහම්බෙනි.

මීට වසර දෙකකට පමණ ඉහත දී මාගේ ව්‍යාපාර පිළිබඳව මාතර පාරිභෝගිකයන් දැනුවත් කිරීම සඳහා පෝස්ටර්, බැනර්, අත් පත්‍රිකා වැනි සාම්ප්‍රදායික ප්‍රචාරණ මාධ්‍යන් සඳහා අධික පිරිවැයක් දැරීමට සිදු විය. එවැනි බොහෝ ප්‍රචාරණ ක්‍රම නාගරික නීති මගින්ද වළක්වා තිබූ අතර නාගරික ජනතාව අතර වෙළඳ පණිවුඩය ඒකාකාරීව පැතිරවීමට ඒවා සමත් වූයේ ද නැත.

බොහෝ විට ප්‍රචාරණ මාධ්‍යක් ලෙස අත් පත්‍රිකා මුද්‍රණය කළ හෙයින් ඒවා මුද්‍රණය කිරීමට යන පිරිවැය පිළිබඳව ඒ අවධිය වන විට මම හොඳින් දැනුවත් වී සිටියෙමි. අත් පත්‍රිකා සඳහා නිසි පාරිභෝගික අවධානයක් යොමු නොවන බව අත්දැකීමෙන් දත් මා කල්පනා කළේ එම පණිවුඩය පිටු කිහිපයක කුඩා පුවත්පතක් ලෙස ලබා දිය හැකි නම් වඩාත් පිළිගැනීමකට ලක් විය හැකි බවයි. සැබවින්ම මාගේ ආයතනය මාසිකව වියදම් කළ සම්පූර්ණ ප්‍රචාරණ පිරිවැය එකතු කර බැලූ විට ඊට දෙගුණයකට ආසන්න මුද්‍රණ පිරිවැයකින් පිටු කිහිපයක කුඩා පුවත් පතක් මුද්‍රණය කර බෙදා හැරීමේ හැකියාවක් ඇති බව මට වැටහිණි.

මා මෙන්ම ප්‍රචාරණය සඳහා විශාල පිරිවැයක් දරණ වෙනත් ආයතන කිහිපයක් එකට එකතු වී මෙම කාර්යයට අත ගැසුවහොත් මේ කාර්ය පහසුවෙන්ම කර ගත හැකි විය යුතුය. නමුත් වෙළඳ දැන්වීම් පමණක් අඩංගු ව්‍යාපාර ආයතන කිහිපයක් විසින් පවත්වාගෙන යන දැන්වීම් පුවත්පතක් වරක් බලා විසි කරනවා හැර වෙනත් ප්‍රයෝජනයක් එහි පාඨකයන්ට නොමැති බව මට තේරුම් ගියේය. ඕනෑම වෙළඳ භාණ්ඩයක් මිලදී ගැනීමට පාරිභොගිකයා පෙළඹවීමට නම් එම භාණ්ඩය හෝ සේවාව පිළිබඳව පණිවිඩය වඩාත් විශ්වාසනීය මට්ටමින් පාඨකයාට ලබා දිය යුතුය. අපගේ මුද්‍රිත පණිවුඩය මාසයක් හෝ දෙකක් අපගේ පාරිභොගිකයාගේ නිවසෙහි ආලින්දයේ ටීපෝප මත තැබිය හැකි නම් එයට වඩා වටිනා දෙයක් වෙළඳ ව්‍යාපාරයකට තිබිය නොහැකිය.

ජාතික පුවත්පත් වැනි ප්‍රධාන පෙලේ පුවත් පත් වල වෙළඳ දැන්වීම් පල කිරීමෙන් ව්‍යාපාරිකයන් බලාපොරොත්තු වන්නේද මෙයයි. සති අන්ත පුවත් පතක වෙළඳ දැන්වීමක් පල කල විට අඩුම වශයෙන් ඊළඟ සතිය වන තෙක් වත් එම වෙළඳ දැන්වීම පාරිභොගිකයාගේ නිවසෙහි ආලින්දයේ රැඳෙන බව විශ්වාසය. එම පුවත් පත් වල වටිනා ලිපි කියවන සෑම පාඨකයෙකුටම එම ලිපි අතර ඇති දැන්වීම් ඇස ගැසීම වැළක්විය නොහැකිය. එවැනි පුවත් පතක දැන්වීමක් පළ කිරීමෙන්ම එම ව්‍යාපාර ආයතන තම පාරිභෝගිකයාට තම ව්‍යාපාරයේ උසස් මට්ටම පිළිබඳ ඉඟියක් ද වක්‍රව ලබා දෙයි. නමුත් ප්‍රාදේශීයව ව්‍යාපාර පවත්වාගෙන යන ව්‍යාපාරිකයන්ට එවැනි පුවත් පත් වල දැන්වීම් පළ කිරීම සඳහා ලක්ෂ ගණනින් මුදල් වියදම් කිරීම ප්‍රායෝගික නැත.

උදාහරණයක් ලෙස මාතර නගරය හෝ දිස්ත්‍රික්කය කේන්ද්‍ර කර ගෙන ව්‍යාපාර සිදු කරන ආයත වලට අවශ්‍ය වන්නේ තම වෙළඳ පණිවුඩය ඉතාමත් හොඳින් ඒකාකාරීව මාතර ජනතාවට පමණක් ලබා දීමය. නමුත් මීට වසරකට ඉහත කාලය වන තුරුත් මාතර තබා වෙන කුමන දිස්ත්‍රික්කයක වත් එවැනි ව්‍යාපාර සඳහා ප්‍රචාරණයක් ලබා දිය හැකි කිසිදු සාර්ථක මුද්‍රිත මාධ්‍යයක් තිබුණේ නැත.

මේ අනුව මට වැටහී ගියේ ව්‍යාපාර දැන්වීම් පමණක් අඩංගු කුඩා පුවත් පතක් පළ කරනවාට වඩා වැඩි අලෙවිකරණ ලාභයක්, වටිනා ලිපි ඇතුලත් පුවත්පවක් තුළින් ලබා ගත හැකි බවයි. මාගේ ඉලක්කය වූයේ මාතර ජනතාව වන බැවින් ඔවුන් ආදරය කළ හැකි ඔවුන්ගේම පුවත් පතක් ලබා දිය හැකි නම් එම ක්‍රියාවලිය සාර්ථක වනු ඇත යන්නයි. මාතර Today සඳහා පළමු සංකල්පය පැණියේ එතැන් සිටය.

මාතර දිස්ත්‍රික්කය කේන්ද්‍ර කර ගත් පුවත් පතක් කරනවා යනු ඉතා පහසු කාර්යක් නොවන බව මට වැටහිණි.  විශේෂයෙන්ම අමතර ලිපි ඇතුලත් කිරීමට නම් වැඩිපුර පිටු සංඛ්‍යාවක් පුවත් පතට ඇතුල් කළ යුතුය. පාඨකයාගේ ආලින්දයේ ටීපෝව මත එම පුවත් පත රඳවා තිබීමට අවශ්‍ය නම් ඉතාමත් ඉහළ මුද්‍රණ තත්වයකින් මුද්‍රණය කළ යුතුය. අනෙක් අතට මෙවැනි අළුත් මාධ්‍යයක් කොතරම් උසස් වුවත් එකවර මිලදී ගැනීමට පාඨකයා නොපෙළඹිය හැකිය. මේ නිසා මුද්‍රණ පිරිවැය බලාපොරොත්තු වූවාට වඩා ඉහළ ගිය අතර බෙදා හැරීමට තීරණය වූයේ ද නොමිලේමය.

මාතර Today පුවත් පතින් කිසිඳු ආර්ථික ලාභයක් ලැබීමේ අරමුණක් මා තුළ නොවීය. ඒ තුළින් මා හට අවශ්‍ය වූයේ මාගේ මාසික ප්‍රචාරණ පිරිවැයද ඇතුලත් කර ඉතිරි පිරිවැය අනෙකුත් සහෝදර ව්‍යාපාර වලින් පියවා ගැනීමය. මේ නිසා වෙළඳ දැන්වීම් සඳහා සාධරණ අගයක් තීරණය කර ඒ සඳහා අනෙකුත් ව්‍යාපාර ආයතන වලට ආරධනා කළෙමි. මෙතෙක් එවැනි ප්‍රාදේශීය පුවත් පත් සාර්ථක වී නොතිබුණද බොහෝ ව්‍යාපාරිකයන් මාතර Today කණ්ඩායමට ප්‍රචාරණ අනුග්‍රාහකත්වයක් ලබා දීමට මැලි වූයේ නැත.

වසරක් පුරා නොමිලේ බෙදා දුන් මාතර Today සඟරාව එලෙස නොමිලේම මාතර ජනතාවගේ අතට පත් වූයේ එයට අනුග්‍රාහකත්වය ලබා දුන් ව්‍යාපාරිකයන්ගේ දායකත්වයෙනි. එබැවින් වසරක් පුරා මාතර Today සඟරාව රැගෙන ඒමේ ගෞරවයෙන් විශාල කොටසක් ඔවුන්ට අනිවාර්යෙන්ම හිමිවිය යුතුය.

මාතර Today සංකල්පය මා තුළ ජනිත වුවත් එය ආරම්භ කිරීමට තවත් වසරක පමණ කාලයක් ගත විය. නමුත් එම කාල සීමාව තුළ මුද්‍රණ කලාව පිළිබඳව හැදෑරීමටත් මාතර Today සාර්ථක කර ගැනීමට අවශ්‍ය කණ්ඩායම ඒකරාශී කිරීමටත් හැකිවිය. වැදගත්ම කරුණ නම් මාතර Today කණ්ඩායමට සම්බන්ධ වූ බොහෝ දෙනා පළමු පුවත් පත සැකසීමට ආසන්න වන තෙක්ම ඔවුන් සැබවින්ම සේවයට බඳවා ගනු ලැබුවේ එම සඟරාව වෙනුවෙන් බව නොදැන සිටීමයි.

අද වන විට මාතර Today පුවත් පත මුද්‍රණය කිරීමට ලබා දෙන මෙන් මාතර මුද්‍රණාල රාශියක් මා වෙත නිරන්තරව ඉල්ලීම් සිදු කරයි. අද ඔවුන් එය සලකන්නේ වාණිජ අරමුනකටත් වඩා ඔවුන් වෙත ලැබෙන ගෞරවයක් ලෙසටය. නමුත් පළමු මාතර Today පුවත් පත මුද්‍රණය කර දෙන ලෙස මාතර බොහෝ මුද්‍රණාල වලට ඉල්ලීම් කළ මුත් ඔවුන් කිසිවෙකු ඒ පිළිබඳ කිසිදු තැකීමක් කළේ නැත. එයට ප්‍රධානම හේතුව වූයේ මෙවැනි පුවත් පතක් පළ කල නොහැකි බවට ඔවුන් තුළ පැවති විශ්වාසයයි. අවසානයේදී පළමු මාතර Today පුවත් පත මුද්‍රණය කර ගැනීමට සිදු වූයේ කොළඹ සුපිරි මුද්‍රණාලයකිනි. මුද්‍රණ කලාව පිළිබඳ විශාල අත්දැකීමක් නොතිබුණු මට ඒ පිළිබඳ කියා දෙමින් කිසිදු ආර්ථික ලාභයක් අපේක්ෂා නොකරමින් ඊට සහාය දුන් රෝහිත විජේවර්ධන මහතා සහ එම මුද්‍රණාලයේ කාර්ය මණ්ඩලයට මා තවමත් ණයගැතිය.

මාතර Today ආරම්භ කිරීම සැබවින්ම මා හට තනිව කිසි දිනෙක සිදු කර ගත නොහැකි කාර්යයකි. එය සාර්ථක වීම පිටුපස සැබවින්ම සිටියේ මාතර Today කණ්ඩායමයි. ඔවූහු බොහෝ විට මාතර Today පිළිබඳ මටත් වඩා විශ්වාසයකින් පසු වූහ. වසරක් පුරා රැගෙන ඒමට සැබෑම සවිය වූයේ එයමය.

මාතර Today සැබවින්ම සිහිනයක් වූයේ ඒ පිළිබඳ විශ්වාස නොකළ පුද්ගලයන්ට පමණි. එය මටත් මාතර Today කණ්ඩායමටත් සිහිනයක් නොවූ නමුත් වසරක් පුරා පැමිණි ගමන් මග දෙස නැවත හැරී බලන විට එය සැබවින්ම සැබෑවූ සුන්දර සිහිනයක් වැනිය.

Editorial: Nirman Kodithuwakku – Matara Today 2011 Aug-Sep

දෙවන දශකය

403921_355110907839835_1117063612_n2011 වසරට පා තබන මෙම සුභ මොහොතේ මාතර Today පස්වෙනි කලාපයෙහි කතුවැකිය සටහන් කිරීමට ලැබීමට භාග්‍යයක් ලෙස මම සලකමි. 21 වැනි සියවස ආරම්භ වූ 2001 වර්ෂය අපට තවමත් දැනෙන්නේ අද ඊයේ වාගේ දශකයක් යනු සැබවින්ම දිගු කාලයක් වුවද 2011 විවර කරන්නේද 21 වැනි සියවසේ දෙවන දශකයයි. ගෙවුනු දශකය තුළ මුළු රටම මෙන්ම මාතර නගරයද බෙහෙවින් වෙනස්වීම් වලට ලක්විය. සංවර්ධනය අතින් මාතර ඇතුළු ශ්‍රී ලංකාවේම විශාල දියුණුවක් ඇතිවී ඇති නමුත් මාගේ පුද්ගලික විශ්වාසය නම් ශාපලත් යුද්ධය නිමා වීම පමණක් වුවද ගෙවුණු දශකය තුළ නොමැකෙන සටහනක් තැබීමට ප්‍රමාණවත් බවය. අතිගරු ජනාධිපති තුමන් ඇතුළු රටේ නායකයින්ගේ අරමුණු 2011 න් ආරම්භ වන දශකය රටෙහි සංවර්ධනයෙහි දශකය බවට පත් කිරීමයි. එය මාතර Today අපගේ විශ්වාසය හා බලාපොරොත්තුවයි. මෙහිදී මානව සංවර්ධනය හා ආර්ථික සංවර්ධනය යන අංශ දෙකම එක ලෙස පවත්වාගෙන යා යුතු අතර රටෙහි සංවර්ධනයට මෙම දෙඅංශයෙන්ම සිදුවන සංවර්ධනය අතිශයින් වැදගත්ය.

හිටපු ඉන්දියානු ජනාධිපති ආචාර්ය අබ්දුල් කාලාම් මහතා විසින් පවසා ඇති පරිදි “මහජනතාවගේ වගකීම ඡන්දය භාවිතා කිරීමෙන් අවසන් වන්නේ නැත.” යන්නයි. එය සැබවින්ම සත්‍යයකි. තමන්ගේ කුණු ටික පාරට දමා නගර සභාවට එය ඉවත් නොකිරීම සම්බන්ධව දොස් පැවසීම, ප්‍රවාහන පද්ධතියේ අඩු පාඩු වලට රජයට දොස් පැවසීම වැනි දේට වඩා මහජනතාවට ඉටු කළ හැකි වගකීම් බොහෝය. ලොව දියුණු සෑම රටක්ම ඔප්පු කොට පෙන්වා ඇත්තේ ඔවුන්ගේ දියුණුවට ප්‍රධානතම සාධකය වූයේ පැවති රජයට වඩා මහජනතාවගේ කැපවීම බවයි. ඒ සෑම රටකම ජනතාව තමාට හැකි පමණින් රටේ සංවර්ධනයට දායක වී ඇත.

කතුවරයාගේ පුද්ගලික විශ්වාසය නම් රටෙහි පුද්ගලයන් තනි තනිව සතා සාධාරණ හා නීත්‍යානුකූලව තමාගේ ආර්ථික දියුණුව උදෙසා කැප වෙයි නම් රටෙහි ආර්ථිකයද ඉබේම දියුණුව කරා ළඟා වෙන බවයි. එසේ නොමැතිව කොතරම් අධිවේගී මාර්ග ඉදි කලද, ගොඩනැගිලි ප්‍රවාහන පහසුක්ම රජය විසින් සපයා දුන්නද සමස්ථ රටෙහි සංවර්ධනයක්, ඉන් කිසිසේත්ම අපේක්ෂා කළ නොහැකි බවයි. එය යම් දිනෙක කෙළවර වන්නේ රට තව තවත් විදේශයන්ට ණය කරුවෙක් බවට පත් කරවමිනි.

සැබවින්ම කළ යුත්තේ රජය විසින් ලබා දෙන පහසුකම් ආයුධ ලෙස භාවිතා කර තමාගේ පුද්ගලික ආර්ථික සටන මෙහෙය වීමයි. මේ සඳහා පක්ෂ විපක්ෂ භේදයක් අවශ්‍ය නොවන්නේ එම ආර්ථික සටන ජයග්‍රහණය කළ හොත් එහි ප්‍රතිලාභ ලැබෙන්නේ තමාටම වන හෙයිනි.

හිටපු ඉන්දීය ජනාධිපති ආචාර්ය අබ්දුල් කාලාම් මහතා පවසන පරිදි මහජනතාවට අඩුම වශයෙන් පාරේ වැටී ඇති කොළ කෑල්ලක් හෝ නිවැරදිව කුණු භාජනයකට දැමිය හැකි නම් එය ඔහු විසින් රටට කරනා සේවයකි. තැන තැන කෙළ නොගැසීම, කහ ඉරෙන් පාර පැනීම වැනි කුඩා නීති වලට ඔවුන්ට අනුකූල විය හැකි නම් ඔවුන් රටෙහි නිවැරදි පුරවැසියන්ය. එවන් කුඩා පිළිවෙත් වුවද රැකිය නොහැකි ඡන්දය පමණක් භාවිතා කර රටෙහි සංවර්ධනය අපේක්ෂා කරන පුරවැසියා සැබවින්ම අමනයෙකුට වඩා දේශද්‍රෝහියෙකි.

අපට මෙම කාර්යය අඩුම වශයෙන් මාතරින් හෝ ආරම්භ කළ හැකි නම් ඉතා අගනේය. ඉතිහාසයේ කෙදිනක වුවද රටෙහි වෙනස් කම් ආරම්භ වූයේ දකුණින්ය. එබැවින් රටෙහි නියම සංවර්ධන විප්ලවයද අපට දකුණේ මාතරින්ම ආර්ම්භ කළ හැකිය.

ක්‍රමවත් විනයගරුක සමාජයක් ලෙස මාතර නගරය පුද්ගලිකවම දියුණු කිරීමට පාඨක ඔබ සැමට ඉතා පහසුවෙන් දායක විය හැකිය. උසස් පෙළ අසමත් වූ තරුණයන් විශ්ව විද්‍යාල ප්‍රවේශය නොලැබීම ගැන ශාප කරනවා වෙනුවට කිසියම් වූ රැකියාවක් හෝ කර්මාන්තයක් කිරීමට උගත යුතුය. විශ්ව විද්‍යාල ශිෂ්‍යයන් රජයෙන් රැකියා ලබා නොදීම ගැන තමාට නොමිලේ ඉගැන්වූ රජයට ශාප නොකර පුද්ගලික අංශය තමා වෙත පැමිණ තමාට රැකියා වලට ආරාධනා කරන මට්ටමට තම නිපුණතා, පොත පතට පමණක් සීමා නොවී වර්ධනය කර ගත යුතුය. තමාගේ වගකීම රජයට භාර දී රජයේ රැකියාවකින් සදහටම යැපීමට බලාපොරොත්තු වන කාලකණ්නි අදහස මාතර තරුණ පරපුරෙන් ඉවත් කර ගත හැකි නම් අපට 2021 තෙවන දශකය ආරම්භයේ දී මාතර ගැන කතා කිරීමට සිදුවන්නේ දියුණු, බුද්ධිමත්, ධනවත් තරුණ පරපුරක් සිටින ලොව දියුණුම නගරයක් ලෙසය.

2011 වසර ධෛර්යවන්ත මාතර පුරවැසියන් දියුණුවට පත් වන සුභ නව වසරක් වේවා යැයි “මාතර Today” අපි ප්‍රාර්ථනා කරමු.

Editorial: Nirman Kodithuwakku – Matara Today 2011 Jan – Mar